შვეიცარიის ნაკრების მთავარმა მწვრთნელმა ვლადიმირ პეტკოვიჩმა საქართველოსთან მატჩის წინ პრესკონფერენციაზე გუნდის კაპიტანი სტეფან ლიხშტაინერი და ნახევარმცველი დენის ზაკარია იახლა.

ორივე ფეხბურთელი ფიქრობს, რომ შვეიცარია ფავორიტია, მაგრამ ადვილ თამაშს არ ელოდებიან. ლიხშტაინერმა ხაზი გაუსვა, რომ მიმდინარე შესარჩევ ეტაპზე შვეიცარიამ ფავორიტის რანგში ბევრი ქულა დაკარგა.

„კარგად ვივარჯიშეთ და დავხვეწეთ შეთამაშების საკითხი. ვინც აქ არის, აქვთ სათანადო თვისებები და ამიტომ, მე შეშფოთებული არ ვარ. შეტევაში ბევრი ფეხბურთელი გვაკლია? არ არის საჭირო ამაზე მეტისმეტი ფიქრი. მჯერა, რომ ყველამ საკუთარ როლზე და თამაშზე უნდა იფიქროს. რა თქმა უნდა, ფავორიტები ვართ, მაგრამ ამ შესარჩევ ციკლში ბევრჯერ ვიყავით ფავორიტები, თუმცა სირთულეები შეგვექმნა და ქულები დავკარგეთ“, - თქვა ლიხშტაინერმა.

„გასახდელში ჯანსაღი ატმოსფეროა, ნაკრების ახალი სახეები გუნდთან ადვილად ინტეგრირდებიან. თბილისში ძალიან მძიმე თამაში გვქონდა და პირველი გოლის გასატანად დიდი დრო დაგვჭირდა. მაგრამ, ახლა ჩვენ ფავორიტები ვართ, საქართველოს ნაკრებზე ძლიერი გუნდი გვყავს და იმედია ამას სენტ გალენში დავამტკიცებთ“, - განაცხადა ზაკარიამ.

შეგახსენებთ, შვეიცარია - საქართველოს მატჩი 15 ნოემბერს, თბილისის დროით 23:45 საათზე დაიწყება. შეხვედრას სენტ გალენი უმასპინძლებს და საზოგადოებრივი მაუწყებლის „პირველ არხი“ პირდაპირ ტრანსლაციას გეგმავს.