ავსტრიული „ზალცბურგის“ ფორვარდი ერლინგ ჰოლანდი შესაშურად შედეგიან თამაშსა და რეკორდების დამყარებას აგრძელებს. ნორვეგიელმა ამჯერად „ნაპოლიც“ არ დატოვა უპატივცემულოდ და ორი გოლი გაუტანა.

შედეგად, ჰოლანდი ჩემპიონთა ლიგის ისტორიაში პირველი ფეხბურთელი გახდა, რომელმაც აღნიშნული ტურნირის საწყის სამ მატჩში 6(!) გოლი გაიტანა. ერლინგმა პირველ ტურში (სადებიუტო შეხვედრა ჩემპიონთა ლიგაზე - რედ) „გენკს“ ჰეთ-თრიქი შეუსრულა, წინა ტურში „ენფილდ როუდზე“ „ლივერპულიც“ დაამწუხრა, ახლა კი „ნაპოლისთან“ დუბლი მიითვალა (ამასთან, ერთი გოლიც გაუუქმეს).

გარდა ამისა, ჰოლანდი კარიმ ბენზემას შემდეგ მეორე თინეიჯერი ფეხბურთელი გახდა, რომელმაც ჩემპიონთა ლიგაზე საწყის სამ თამაშში მოედანი უგოლოდ არ დატოვა. თუმცა, ფრანგს ნორვეგიელისგან განსხვავებით თავი 6-ჯერ არ გამოუჩენია...

საერთოდ, 19 წლის ჰოლანდი როგორც ჩანს, რეკორდების ნამდვილი მტერია, რადგან ჯერ იყო და, ზაფხულში მსოფლიოს 20-წლამდე ჩემპიონატზე ერთ მატჩში 9(!) გოლი გაიტანა, ხოლო „გენკთან“ შესრულებული ჰეთ-თრიქიც ბუნებრივია ისტორიის მიღმა არ დარჩენილა.

მიუხედავად ნორვეგიელის ფანტასტიკური გარჯისა, „ზალცბურგი“ „ნაპოლისთან“ (2:3) მაინც დამარცხდა და ჯგუფიდან გასვლის საკითხი მეტისმეტად გაირთულა.