დორტმუნდის „ბორუსიას“ მთავარმა მწვრთნელმა ლუიენ ფავრმა დისციპლინის დარღვევისთვის ჯეიდონ სანჩო დასაჯა. Kicker-ის ცნობით, ინგლისის ნაკრებიდან ახალგაზრდა შემტევი გუნდს დაგვიანებით შეუერთდა, რის გამოც ფავრმა დღეს, „გლადბახთან“ მატჩის განაცხადში არ შეიყვანა.

გარდა ამისა, არაა გამორიცხული, რომ სანჩოს სასჯელის გამო ჩემპიონთა ლიგაზე „ინტერთან“ თამაშის გაცდენაც მოუწიოს, თუმცა ჯერჯერობით ეს ცნობა ოფიციალურად არ დასტურდება.

მიუხედავად იმისა, რომ ინგლისელი „დორტმუნდის“ ერთ-ერთი ლიდერია, ფავრის მესიჯი ნათელია - გუნდის შინაგანაწესსა და დისციპლინაზე მაღლა არავინ დგას.

შეგახსენებთ, რომ მიმდინარე სეზონში 19 წლის ფეხბურთელის ანგარიშზე 4 გოლი და 7 საგოლე პასია.