გერმანიის ბუნდესლიგის მესამე ტური ფრანკფურტში დასრულდა, სადაც „აინტრახტმა“ დიუსელდორფის „ფორტუნას“ უმასპინძლა და უმძიმეს ბრძოლაში 3 ქულა ხელიდან გამოგლიჯა.

პირველი ტაიმის ბოლოს ჰენინგსის გოლით სტუმრები წინ გავიდნენ და ფრანკფურტელები რთულ ვითარებაში აღმოჩნდნენ. თუმცა, მეორე ნახევარში ვითარება შეიცვალა. „აინტრახტის“ დებიუტანტმა ბას დოსტმა, რომელიც შესვენებაზე გამოჩნდა მინდორზე, 12 წუთი მოანდომა ახალი გუნდის რიგებში სადებიუტო გოლის გატანას და ანგარიში გაათანაბრა. 86-ე წუთზე კი პასიენსიამ გამარჯვება მოუტანა ფრანკფურტელებს, რომელმაც 6 ქულა დააგროვეს და ლიდერთა ზონასთან ტრიალებენ.

იქამდე, სანამ „აინტრახტი“ მოიგებდა, „ვერდერმა“ ნანატრი გამარჯვება მოიპოვა. ბრემენში „აუგსბურგი“ ჩავიდა და ორივე გუნდისთვის უმნიშვნელოვანესი შეხვედრა იყო, რადგან მოგებათა გრაფაში ნული ეწერათ. „ვერდერი“ ორჯერ იგებდა, მაგრამ სტუმრებმა ორჯერვე გაათანაბრეს. გადამწყვეტი სიტყვა იუია ოსაკომ თქვა, რომელმაც 67-ე წუთზე საბოლოო ანგარიში დააფიქსირა. „ვერდერმა“ ორი წაგების შემდეგ პირველად იმარჯვა და ხასიათი სანაკრებო პაუზის წინ გამოიკეთა, „აუგსბურგს“ ი კინკილა ქულა აქვს და ბევრი შრომა მოუწევს ბუნდესლიგაში ადგილის შენარჩუნება თუ უნდა.

„ვერდერი“ – „აუგსბურგი“ 3:2 (2:1)

გოლები: 1:0 ოსაკო (6), 1:1 ვარგასი (12), 2:1 სარგენტი (21), 2:2 ვარგასი (46), 3:2 ოსაკო (67)

„აინტრახტი“ – „დიუსელდორფი“ 2:1 (0:1)

გოლები: 0:1 ჰენინგსი (36), 1:1 დოსტი (57), 2:1 პასიენსია (86)