იტალიური „რომამ“ ცოცხალმა ლეგენდამ ფრანჩესკო ტოტიმ დატოვა. „ჯალოროსის“ აწ უკვე ყოფილმა ტექნიკურმა დირექტორმა ეს გადაწყვეტილება სპეციალურ პრესკონფერენციაზე გაასაჯაროვა.

„იმედი მქონდა, რომ ეს დღე არასდროს დადგებოდა, მაგრამ დადგა, რომელიც ჩემთვის საშინელებაა, სიკვდილს უდრის. „რომაში“ ჩემს პოსტს ვტოვებ, ეს რთულად მისაღები გადაწყვეტილება იყო, მაგრამ ჩემი ბრალი არაა. ტექნიკურ არეალში ეფექტურად მუშაობის საშუალება არ მქონდა. პირველ წელს ეს შესაძლოა მისაღები იყო, მაგრამ სიტუაცია არც მეორე სეზონშიც შეიცვალა. მათ იცოდნენ ჩემი განზრახვა, რომ გუნდისთვის მაქსიმუმი გამეკეთებინა, მაგრამ იგივე სურვილი მეორე მხარეს არ ჰქონია.

ცხადია, „რომას“ გულშემატკივრებს ვურჩევ, რომ კლუბის ქომაგობა ამ რთულ მომენტებშიც გააგრძელონ. ეს არის ნახვამდის და არა მშვიდობით.

ახალი მწვრთნელი? ერთადერთი ვისაც დავურეკე ანტონიო კონტე იყო. დანარჩენებთან კონტაქტი არ მქონია და მესიჯიც კი არ არავისთვის გამიგზავნია. სხვა იტალიური გუნდებიდან წინადადებები უკვე მაქვს და ვნახოთ რა მოხდება. ერთადერთი ვიცი, რომ „ლაციოში“ არ წავალ, რადგან „რომასა“ და „ლაციოს“ გულშემატკივრებს პატივს ვცემ“, - თქვა ტოტიმ.

ამრიგად, 30 წლის შემდეგ „რომასა“ და ტოტის გზები გაიყო. ფრანჩესკო „ჯალოროსის“ ახალგაზრდულ გუნდში 1989 წელს მოხვდა, ხოლო მთავარ გუნდში დებიუტი 1992 წელს ჰქონდა, რის შემდგომაც „მგლებს“ 2017 წლამდე უერთგულა. კარიერის დასრულების შემდეგ კი, ლეგენდარული იტალიელი დაუყოვნებლივ გუნდის სტრუქტურაში მოხვდა.