დიეგო გოდინი მადრიდის „ატლეტიკოს“ ტოვებს. ურუგვაელმა მცველმა დღეს პრესკონფერენცია გამართა, სადაც ოფიციალურად დაადასტურა, რომ ზაფხულში „როხიბლანკოს“ წევრი აღარ იქნება.

„აქ მოვედი იმისთვის რომ გითხრათ: ბოლო დღეებს ვატარებ „ატლეტიკოში“. მადლობა ყველას, ეს ოჯახია, აქ გავატარე საოცარი წლები, გავიზარდე, როგორც ფეხბურთელი და ადამიანი. აქ განვიცადე დიდებული მომენტები, ზოგჯერ არც ისე ლამაზი, მაგრამ „ატლეტიკო“ ყოველთვის ჩემს გულში იქნება. მხედველობაში მაქვს ბევრი სურათი, ბევრი მომენტი. მივიღე გადაწყვეტილება და ეს ადვილი არ ყოფილა. „ატლეტიკოს“ გულშემატკივრად დავრჩები, ეს გუნდი ჩემი ცხოვრებაა.

აქ დიდი ხნის განმავლობაში დარჩენა გადავწყვიტე, „ატლეტიკო“ ყოველთვის ჩემი პრიორიტეტი იყო. წინ ვიყურები და მინდა 40 წლამდე ვითამაშო, მაგრამ ვიცი, რომ ეს პრაქტიკულად შეუძლებელია.

არაფერი იმაზე უკეთესი, როდესაც სტადიონზე შედიხარ და შენი გვარის სკანდირება გესმის“, - თქვა გოდინმა.

„ვანდა მეტროპოლიტანო მისი სახლია, „ატლეტიკო“ მისი ოჯახია და ასე იქნება ყოველთვის. ის ნამდვილი ჩემპიონია და ყოველთვის ჩვენს გულში იქნება. ის იცავდა ჩვენი კაპიტნის სამკლავურს, იბრძოდა ყველა თამაშში, როგორც ბრძოლაში. დღეს ვემშვიდობებით ჩვენი კლუბის ლეგენდას“, - დაამატა პრეზიდენტმა ენრიკო სერეზომ.

დიეგო გოდინი „ატლეტიკოს“ 2010 წელს „ვილიარეალიდან“ შეუერთდა. მას შემდეგ ურუგვაელმა 387 თამაში ჩაატარა და 27 გოლი გაიტანა. მოიგო რვა ტიტული, მათ შორის ესპანეთის ჩემპიონატის, ესპანეთის თასი, ესპანეთის სუპერთასი თითოჯერ, ორჯერ ევროპა ლიგა და სამჯერ ევროპის სუპერთასი.

"ატლეტიკოს" გამოსამშვიდობებელი ვიდეო გოდინს

გავრცელებული ინფორმაციით, გოდინი კარიერას მილანის „ინტერში“ გააგრძელებს, რომელსაც თავისუფალი აგენტის სტატუსით შეუერთდება.