საქართველოს ძიუდოისტთა ნაკრების კაპიტანი ვარლამ ლიპარტელიანი (100 კგ.) პარიზის პრესტიჟული გრანდ სლემის ფინალში გავიდა და საღამოს სესიაში (თბილისის დროით 20:00 საათიდან) ოქროს მედლისთვის იბრძოლებს.

ლიპარტელიანმა დღის პირველ ნახევარში 4 გამარჯვება იზეიმა. ვარლამმა ტაილანდელი ვეი პუიანგი ვაზარით დაჯაბნა, ბულგარელი დანიელ დიჩევი იპონზე დასცა, ფრანგ ალექსანდრე იდირს ვაზარით აჯობა, სამხრეთკორეელ გუჰამ ჩოსთან კი ვაზარით აგებდა, თუმცა, ფინიშამდე წუთით ადრე, მსოფლიოს მოქმედი ჩემპიონი იპონზე დააგდო.
ფინალში ლიპარტელიანის მეტოქე მსოფლიოს 2017 წლის ჩემპიონი აარონ ვულფი იქნება, რომელმაც მე-2 წრეში ლაშა ტაველურს იპონი აგემა. მანამდე, ქართველმა ძიუდოისტმა ამერიკელ სმითს გოლდენ სქორში ვაზარით აჯობა.
დღესვე საქმეში კიდევ 3 ჩვენებური ვიხილეთ, თუმცა, მათ თავი ვერაფრით ისახელეს. 81 კგ-მდე წონით კატეგორიაში კობა მჭედლიშვილმა პირველივე ორთაბრძოლა იპონით წააგო ბელგიელ სამი ჩუჩისთან.
მძიმე წონაში (+100 კგ.) ქართველმა ძიუდოისტებმა მხოლოდ თითო გამარჯვება იზეიმეს. ონისე ბუღაძემ ყაზახი ადილ ორაზბაიევი იპონით დაჯაბნა, იაპონელ კოკორო კაგუერასთან კი ასევე წმინდად დამარცხდა. გიორგი ზაქარიაძემ მონღოლი ცეცენცენგელ ოდხუუს ვაზარი აართვა, აზერბაიჯანის სახელით მოასპარეზე უშანგი კოკაურთან კი 3 შიდო მიიღო.