სამხრეთ კორეულ ჩანგვონში სტარტი აიღო მსოფლიოს 52-ე სალიცენზიო ჩემპიონატმა სროლის სახეობებში (შეჯიბრს 4 395 მონაწილე ჰყავს 91 ქვეყნიდან) და ჩვენი პირველი მონაწილენიც გავიდნენ სტარტზე – ტყვიის სროლაში შერეულ წყვილთა ტურნირში დედა-შვილმა – ნინო სალუქვაძემა და ცოტნე მაჭავარიანმა იასპარეზეს. ისინი 764 ქულით 62 წყვილს შორის მე-15 ადგილზე გავიდნენ. სალუქვაძემ 384 ქულა დააგროვა, მაჭავარიანმა – 380.
ფინალში 5 საუკეთესო წყვილი აღმოჩნდა. მსოფლიოს ჩემპიონები მსოფლიოს რეკორდით რუსები გახდნენ: რიო დე ჟანეიროს ოლიმპიადის ვიცე-ჩემპიონი ვიტალინა ბაცარაშკინა და არტემ ჩერნოუსოვი – 488.1 ქულა. მეორეზე ჩინეთის მეორე გუნდი (ქვეყანას 2-2 წყვილის გამოყვანა შეუძლია) გავიდა 480.2-ით – ქიან ვანი, მენ იი ვანი. ამ ორმა დუეტმა ტოკიოს 2020 წლის ოლიმპიადის ლიცენზიები მიიღო.
ბრინჯაოს 416.7 ქულით უკრაინის მეორე გუნდი დაეუფლა – ოლიმპიური, მსოფლიოსა და ევროპის ჩემპიონი ოლენა კოსტევიჩი და ევროპის ჩემპიონი ოლეჰ ომელჩუკი. მეოთხეზე სერბეთის პირველი ნაკრები გავიდა 376.7-ით – ევროპისა და მსოფლიოს ჩემპიონი ზორანა არუნოვიჩი, ევროპის სამგზის ვიცე-ჩემპიონი დამირ მიკეცი. მეხუთე ესპანეთია 331.6-ით: სონია ფრანქეტი, ევროპის ჩემპიონი პაბლო კარერა.

მსოფლიო პირველობა 15 სექტემბრამდე გასტანს. როგორც აღვნიშნეთ, ტურნირში პირველები ტყვიის მსროლელები ჩაებნენ. ამ სახეობაში საქართველოს ნაკრების შემადგენლობაში უფროსებში ქალებში ნინო სალუქვაძე, ვაჟებში კი ლევან ქადაგიძე და ცოტნე მაჭავარიანი იასპარეზებენ. ახალგაზრდა გოგონებში ძალებს ლიზი კილაძე და ნინო ხუციბერიძე სცდიან, ბიჭებში კი – აკაკი მოსულიშვილი.
სასტენდო სროლაში წარმომადგენლები მხოლოდ მრგვალ სტენდზე გვყავს. ვაჟებში დავით ქვათაძე, თენგიზ იმნაიშვილი და ვლადიმერ ნარჩემაშვილი გამოვლენ, ქალებში კი მხოლოდ ნატალია პანასი ისვრის. ახალგაზრდებში მონაწილე არ გვეყოლება. პანასი მოსკოვიდან გადაფრინდება სამხრეთ კორეაში, ვაჟები კი 5 სექტემბერს გაემგზავრებიან, რადგან მრგვალ სტენდზე შეჯიბრებები 9 სექტემბრიდან იწყება.
მსოფლიოს ჩემპიონატი პირველი ტურნირია, სადაც პირდაპირ გაიცემა ტოკიოს 2020 წლის ოლიმპიადის საგზურები – ყველა სახეობაში 4-4.
გთავაზობთ ჩვენი ტყვიის მსროლელების გამოსვლის განრიგს:

4 სექტემბერ. პნევმატური პისტოლეტი. ქალები
09:00 - 10:15 10m Air Pistol Women Relay 1
11:00 - 12:15 10m Air Pistol Women Relay 2
13:15 Final 10m Air Pistol Women

5 სექტემბერი. ახალგაზრდები, გოგოები. პნევმატური პისტოლეტი
10:30 - 11:45 10m Air Pistol Women Junior
12:45 Final 10m Air Pistol Women Junior

6 სექტემბერი. პნევმატური პისტოლეტი - უფროსები, ახალგაზრდები
09:00 - 10:15 10m Air Pistol Men Relay 1
11:00 - 12:15 10m Air Pistol Men Relay 2
13:15 Final 10m Air Pistol Men

09:00 - 10:15 10m Air Pistol Men Junior
11:15 Final 10m Air Pistol Men Junior

7 სექტემბერი, ქალები სპორტული პისტოლეტი
09:00 - 11:05 25m Pistol Women Precision Stage

8 სექტემბერი, ქალები სპორტული პისტოლეტი
13:00 - 14:20 25m Pistol Women Rapid Fire Stage
15:30 Final 25m Pistol Women