კატალონიის “ბარსელონას” გამარჯვებას გამარჯვებითვე უპასუხა მადრიდის “რეალმა”. ხულენ ლოპეტეგის გუნდმა ესპანეთის ლა ლიგის პირველ ტურში მადრიდული დერბი მოიგო “ხეტაფესთან”.

“სამეფო კლუბს” არანაირი პრობლემა არ შექმნია და ძალების მინიმალური დანახარჯით სძლია თანაქალაქელს. “ხეტაფემ” მეტოქის კართან ვერანაირი ხიფათი ვერ შექმნა და დაცვაშიც არასაიმედოდ ირჯებოდა. “რეალმა” კი ამ ყველაფრით იდეალურად ისარგებლმა. “ბლანკოსმა” ორივე გოლი მეტოქის შეცდომების ხარჯზე შეაგდო.

ჯერ იყო და, დავიდ სორია გამოვიდა კარიდან დაუფიქრებლად და იქვე ჩასაფრებულმა დანი კარვახალმა თავური დარტყმით გახსნა ანგარიში, როგორც ამ მატჩში, ისე სეზონში. მეორე ნახევარში კი, მარკო ასენსიომ მცველს მოპარა ბურთი და გარეთ ბეილს უპასა. უელსელმა ერთი შეხებით დააგვირგვინა შეტევა. “რეალმა” პირველი სამი ქულა მიითვალა, თანაც გადახალისებული შემადგენლობით. მაგალითისთვის, არ უთამაშია რაფაელ ვარანს, ხოლო კაზემირო და ლუკა მოდრიჩი ოდენ მეორე ნახევარში გამოჩნდნენ მინდორზე.

პირველ ტურის გმირად კი შეგვიძლია ანდრე სილვა მოვნათლოთ. დებიუტანტი, რომელმაც ჰეთ-თრიქი გაიფორმა. პორტუგალიელი ლა ლიგის ისტორიაში გახდა პირველი მოთამაშე, რომელმაც 21-ე საუკუნეში სადებიუტო შეხვედრაში სამჯერ გამოიჩინა თავი. 22 წლის შემტევმა ამის გაკეთება მადრიდში, “რაიო ვალეკანოსთან” შეძლო და “სევილიამ” სეზონი რიხიანად დაიწყო – 4:1.

იგივე ითმის დებიუტანტ “უესკაზე”, რომელმაც სტუმრად ალექს გალარის დუბლით “ეიბარი” დაამარცხა და ლა ლიგაში დიდებული სტარტი აიღო. ესპანეთის ჩემპიონატის პირველი ტური ორშაბათს, ორი მატჩით დასრულდება: ცენტრალური შეხვედრა “მესტალიაზე” “ვალენსიასა” და მადრიდის “ატლეტიკოს” შორის შედგება, ხოლო "ბილბაო" "ლეგანესს" უმასპინძლებს.

“ეიბარი” – “უესკა” 1:2 (0:2)

გოლები: 0:1 ალექს გალარი (5), 0:2 ალექს გალარი (40), 1:1 ესკალანტე (69)

“რაიო ვალეკანო” – “სევილია” 1:4 (0:3)

გოლები: 0:1 ვასკესი (15), 0:2 ანდრე სილვა (31), 0:3 ანდრე სილვა (45), 0:4 ანდრე სილვა (79), 1:4 ემბარბა (85, პენ)

“რეალი” – “ხეტაფე” 2:0 (1:0) VIDEO

გოლები: 1:0 კარვახალი (20), 2:0 ბეილი (51)