იტალიური “რომა” ჩემპიონთა ლიგის მეოთხედფინალში ზუსტად 10 წლიანი პაუზის შემდეგ გავიდა. “ჯალოროსიმ” ამის გაკეთება სტუმრად გატანილი გოლის წყალობით მოახერხა.

სამი კვირის, ხარკოვში წაგებული 1:2 შემდეგ “რომას” შანსი არცთუ ისე ფასობდა და ბევრი თვლიდა, რომ შემდეგ ეტაპზე დონეცკის “შახტარი” გავიდოდა. თუმცა, ეუსებბიო დი ფრანჩესკოს გუნდმა საწადელს მაინც მიაღწია. ისე კი, ძალზე მოსაწყენი თამაში შედგა “სტადიო ოლიმპიკოზე” მოსაყოლი ბევრი არც არაფერია. მაგალითად, უკრაინის ჩემპიონს იტალიელთა კარის ჩარჩოში საერთოდ არ დაურტყამს და რა გასაკვირია, რომ სასურველ შედეგს ვერ მიაღწია. თუმცა, არავინ იცის რა მოხდებოდა, რომ არა კონცენტრაციის წამიერი მოდუნება, რაც “შახტარს” გაშვებულ გოლად და ორი მატჩის ჯამში მარცხის ფასად დაუჯდა.

52-ე წუთზე არსაიდან, კევინ სტროტმანმა ჩინებული პასით ედინ ჯეკო პიატოვს შეჰყარა და ბოსნიელმა ფორვარდმა ერთი შეხებით ფეხებს შორის გაუძვრინა ბურთი. აქამდე ჩაკეტილი თამაში, გოლის შემდეგ კიდევ უფრო ჩაიკეთა და საგოლე მომენტი საერთოდ აღარ შექმნილა. ბოლოსკენ იმავე ჯეკოზე ორდეცი უკანასკნელი იმედის ჯარიმისთვის გააძევეს და ყველაფერი ნათელი გახდა.

“რომა” მეოთხედფინალშია. სხვათა შორის, 2006-2007 წლების სეზონის შემდეგ პირველად, იტალია ჩემპიონთა ლიგის მეოთხედფინალურ სტადიაზე ორი გუნდით იქნება წამორდგენილი.

“რომა” – “შახტარი” 1:0 (0:0) VIDEO ორი მატჩის ჯამში: 2:2 ("რომა" შემდეგ ეტაპზე სტუმრად გატანილი გოლით გავიდა)

რომი, “სტადიო ოლიმპიკო”

მაყურებელი: 47 693

“რომა” (4-3-3): ალისონი; ფლორენცი, მანოლასი, ფაციო, კოლაროვი; ნაინგოლანი, დე როსი, სტროტმანი; ჯენგიზ უნდერი (ჟერსონი 65), ჯეკო (ელ შაარავი 89), პეროტი

მწვრთნელი: ეუსებიო დი ფრანჩესკო

“შახტარი” (4-2-3-1): პიატოვი; ბუტკო, ორდეცი, რაკიცკი, ისმაილი; ფრედი, სტეპანენკო (პატრიკი 74); მარლოსი (დენტინიო 82), ტაისონი, ბერნარდი; ფერეირა

მწვრთნელი: პაულუ ფონსეკა

გოლი: 1:0 ჯეკო (52)

გაფრთხილება: ფლორენცი (39), მანოლასი (54) – სტეპანენკო (71), ფრედი (76), ფერეირა (80)

გაძევება: ორდეცი (79)

სტატისტიკა – კარისკენ დარტყმები: 7 (3) – 2 (0) ბურთის ფლობა: 41%-59% კუთხურები: 2:6 თამაშგარე: 5:2

მსაჯი: ალბერტო უნდიანო მალიენკო (ესპანეთი)