ლონდონის “ჩელსის” მთავარი მწვრთნელი ანტონიო კონტე “მანჩესტერთან” დაპირისპირების წინ აცხადებს, რომ მისი გუნდი 120%-ით უნდა დაიხარჯოს. გარდა ამისა, იტალიელმა კომენტარი ჟოზე მოურინიოზეც გააკეთა.

“უნდა გვესმოდეს, რომ სეზონის ბოლომდე ყველა თამაში მნიშვნელოვანია. სამი ქულა გვჭირდება როგორც ჩვენ, ისე “იუნაიტედს”. ჩემპიონთა ლიგის ზონაში მოხვედრისთვის ბევრი კარგი გუნდი იბრძვის და დასაკარგი არავის არაფერი აქვს.

მოედანზე მხოლოდ მოსაგებად უნდა გავიდეთ და ასეთ შემთხვევაში იქნება შესაძლებელი სამი ქულის მოპოვება. “მანჩესტერი” ძალიან კარგი გუნდია დიდებული ფეხბურთელებით. 120%-ით უნდა დავიხარჯოთ თუ გვინდა, რომ შედეგს მივაღწიოთ. რთული იქნება, მაგრამ უნდა ვცადოთ.

მოურინიო? – წარსულში იყო აზრთა სხვადასხვაობა, მაგრამ მე თავს კარგად ვგრძნობ ეს თემა საერთოდ არ მაინტერესებს”, - განაცხადა კონტემ.

“მანჩესტერისა” და “ჩელსის” შეხვედრა 25 თებერვალს, თბილისის დროით 18:05 საათზე დაიწყება. აქვე შეგახსენებთ, რომ კონტესა და მოურინიოს შორის საკმაოდ დაძაბული ურთიერთობაა.