იტალიური “მილანის” აღმასრულებელი დირექტორი მარკო ფასონე თავისი კლუბისგან კარგი ფეხბურთის ჩვენებასთან ერთად, შედეგსაც ითხოვს. როგორც მან განაცხადა, ფეხბურთში მხოლოდ კარგი თამაში საკმარისი არაა.
“მილანისგან” არამხოლოდ კარგ თამაშს, არამედ შედეგსაც ველოდები. სწორედ შედეგია ის, რასაც საბოლოოდ ფეხბურთში მნიშვნელობა აქვს. ჩვენ დარწმუნებულები ვართ, რომ “მილანი” სწორი მიმართულებით მიდის, მიუხედავად იმისა, რომ შედეგი, რომელსაც ველოდებით, აგვიანებს. თუმცა, ხალხი მაინც შედეგს ითხოვს”, - თქვა ფასონემ.
იტალიური მედია მიიჩნევს, რომ ეს მესიჯი ვინჩენცო მონტელასკენ იყო მიმართული. ჯერჯერობით კლუბის ხელმძღვანელობა მთავარ მწვრთნელს ნდობას უცხადებს, მაგრამ თუ უახლოეს მომავალში ასე გაგრძელდება, მონტელას ახალი სამსახურის ძებნა მოუწევს.
“როსონერი” ხუთშაბათს ევროპა ლიგაზე აეკ-ს დაუპირისპირდება, ხოლო კვირას “სასუოლოს” ესტუმრება. სწორედ ამ ორი მატჩის ბედზე იქნება დამოკიდებული მონტელას მომავალი.
