ინგლისის ნაკრები მსოფლიოს 2018 წლის ჩემპიონატის ფინალურ ეტაპთან ძალიან ახლოსაა. გარეტ საუთგეიტის გუნდს დარჩენილ ორ ტურში ერთი ქულაც მოუტანს რუსეთში გასამართი მუნდიალის საგზურს.
ინგლისელები F ჯგუფის პირველ ადგილთან ახლოს აქამდეც იყვნენ, მაგრამ კონკურენტ სლოვაკეთთან გამარჯვებამ, ყველაფერს ნათელი მოჰფინა. “უემბლიზე” სლოვაკეთი გზა მოჭრილი ჩავიდა – იან კოზაკის შეგირდებს მხოლოდ სამი ქულა თუ მისცემდათ შვებას, მაგრამ ასე ადვილი როდია ლონდონში ინგლისის ნაკრების ძლევა...
და მაინც, მატჩი სლოვაკთა სწრაფი გოლით დაიწყო: მესამე წუთზე იან ლობოტკამ ჯო ჰარტი უსაქმოდ დატოვა. მასპინძლებმა ნელ-ნელა სათამაშო უპირატესობა ხელთ იგდეს და ტაიმის ბოლოსკენ ამან შედეგიც გამოიღო – ერიკ დაიერმა გაქვითა სტუმართა გოლი. აი, მეორე ტაიმში კი, მატჩის გმირი მარკუს რეშფორდი გახდა, რომელმაც შორი დისტანციიდან შეძლო გატანა და როგორც გაირკვა, გამარჯვების გოლიც გამოდგა. ინგლისი იმავე სლოვაკეთს 5 ქულით უსწრებს და ძნელად წარმოსადგენია, რომ ლიდერობა დაკარგოს.
სამაგიეროდ, დიდი ბრძოლაა გაჩაღებული მეორე, საპლეი-ოფო ადგილისთვის – ერთი პოზიცია და სამი მსურველი. სლოვაკეთი, სლოვენიასა და შოტლანდიას ამჟამად ერთი ქულით უსწრებს. ყველაზე რთული კალენდარი სქოთებს აქვთ – სლოვაკეთი და სლოვენია.
შოტლანდიამ გუშინ მალტას მოკრძალებულად აჯობა – 2:0, ხოლო სლოვენიამ ლიტვა გაანადგურა – 4:0.
ინგლისი – სლოვაკეთი 2:1 (1:1)
გოლები: 0:1 ლობოტკა (3), 1:1 დაიერი (37), 2:1 რეშფორდი (59)
შოტლანდია – მალტა 2:0 (1:0)
გოლები: 1:0 ბერა (9), 2:0 გრიფიტსი (49)
სლოვენია – ლიტვა 4:0 (1:0)
გოლები: 1:0 ილიჩიჩი (25, პენ), 2:0 ილიჩიჩი (61, პენ), 3:0 ვერბიჩი (82), 4:0 ბირსა (90)
| 1. | ინგლისი | 8 | 6 | 2 | 0 | 16:3 | 20 | |
| 2. | სლოვაკეთი | 8 | 5 | 0 | 3 | 14:6 | 15 | |
| 3. | სლოვენია | 8 | 4 | 2 | 2 | 10:4 | 14 | |
| 4. | შოტლანდია | 8 | 4 | 2 | 2 | 14:10 | 14 | |
| 5. | ლიტვა | 8 | 1 | 2 | 5 | 6:18 | 5 | |
| 6. | მალტა | 8 | 0 | 0 | 8 | 2:21 | 0 |
მომდევნო ტური – 5 ოქტომბერი
ინგლისი – სლოვენია
მალტა – ლიტვა
შოტლანდია - სლოვაკეთი
