მსოფლიოს ჩემპიონატის შესარჩევი ციკლის A ჯგუფში ძალიან ცხელი სიტუაციაა – ფინალური ეტაპის 1.5 საგზურისთვის ერთბაშად ოთხი გუნდი იბრძვის. ამასობაში კი, ლუქსემბურგის ნაკრებმა ისტორია დაწერა და საფრანგეთის ნაკრებთან სტუმრად, ქულა მოიპოვა.
ტულუზაში “მამლები” უეჭველად სამ ქულას გეგმავდნენ და თითქოს არც უნდა გასჭირვებოდათ რამე, მაგრამ... დიდიე დეშამის გუნდმა საგოლე მომენტები მრავალად შექმნა, მაგრამ ხან მეკარე თამაშობდა კარგად, ხანაც სიზუსტეს ვერ იჩენდნენ გრიზმანი და კომპანია, ხანაც ძელი უშლიდათ ხელს. თუმცა, ძელმა საფრანგეთიც გადაარჩინა – 78-ე წუთზე ლუქსემბურგის ნაკრების შემტევმა როდრიგუეშმა კოშელნი ბავშვივით მოატყუა და მახვილი კუთხიდან დაარტყა. “მამლები” ძელმა იხსნა... ასე და ამრიგად, საფრანგეთმა მოულოდნელი ორი ქულა დაკარგა და მიუხედავად იმისა, რომ ლიდერობას ჯერაც ინარჩუნებს, შვედეთი უკვე კუდზე აზის. აი, ლუქსემბურგის ნაკრებს კი აფერუმ! – სამი დღის წინ ბელარუსს მოუგეს შინ, ახლა ფრანგებთან ფრე ითამაშეს... ეს, ის შემთხვევაა, როდესაც სიტყვებიც კი ზედმეტია.
თამაშში ჩაერთო ჰოლანდიის ნაკრები – “ნარინჯისფერებმა” შინ კონკურენტი ბულგარეთი დევი პროოპერის დუბლითა და არიენ რობენის გოლით დაამარცხეს და მესამე ადგილზე გადავიდნენ. წინ შვედეთია, რომელსაც 3 ქულით ჩამორჩება. ბოლო ტურში, სწორედ მათი ჯახი გველის ამსტერდამში...
მანამდე კი, შვედეთის ნაკრებმა მინსკში გაილაღა, ბელარუსი გაანადგურა და საფრანგეთის ნაკრებთან სხვაობა ერთ ქულამდე დაიყვანა. A ჯგუფში ისეთი სატურნირო მდგომარეობაა, რომ ცალსახაა, წინ ძალიან საინტერესო ორი ტური გველოდება.
ბელარუსი – შვედეთი 0:4 (0:3)
გოლები: 0:1 ფორსბერგი (18), 0:2 ნიმანი (24), 0:3 ბერგი (37), 0:4 გრანკვისტი (84, პენ)
საფრანგეთი – ლუქსემბურგი 0:0 (0:0) VIDEO
ჰოლანდია – ბულგარეთი 3:1 (1:0)
გოლები: 1:0 პროპერი (7), 2:0 რობენი (67), 2:1 კოსტადინოვი (69), 3:1 პროპერი (80)
| 1. | საფრანგეთი | 8 | 5 | 2 | 1 | 15:5 | 17 | |
| 2. | შვედეთი | 8 | 5 | 1 | 2 | 18:7 | 16 | |
| 3. | ჰოლანდია | 8 | 4 | 1 | 3 | 16:11 | 13 | |
| 4. | ბულგარეთი | 8 | 4 | 0 | 4 | 13:17 | 12 | |
| 5. | ლუქსემბურგი | 8 | 1 | 2 | 5 | 7:17 | 5 | |
| 6. | ბელარუსი | 8 | 1 | 2 | 5 | 4:16 | 5 |
მომდევნო ტური – 7 ოქტომბერი
ბელარუსი – ჰოლანდია
ბულგარეთი – საფრანგეთი
შვედეთი – ლუქსემბურგი
