იტალიური “მილანი” “იუვენტუსის” მცველის ლეონარდო ბონუჩის გადასაბირებლად იბრძვის. Sportmediaset-ის ინფორმაციით, “როსონერი” მზადაა, 30 წლის ფეხბურთელის სანაცვლოდ “იუვეს” მატია დე შილიო, ალესიო რომანიოლი და თან გარკვეული ოდენობის თანხაც დაუთმოს.

მზადაა ბონუჩის პირადი კონტრაქტიც – სეზონში 7 მილიონი ევრო. როგორც ირკვევა, “მილანმა” “იუვენტუსს” 2 დღე მისცა აღნიშნულ წინადადებაზე მოსაფიქრებლად.

იტალიური მედია ბონუჩის აგენტის, ალესანდრო ლუჩის კომენტარს აქვეყნებს, რომელიც მისი კლიენტის “ბებერი ქალბატონიდან” წასვლას არ გამორიცხვას:

“ჩვენ ვმუშაობთ სხვადასხვა საკითხზე და მათ შორის გუნდის შეცვლის თემაზეც”, - თქვა ლუჩიმ.

ლეონარდო ბონუჩი “იუვენტუსში” 2010 წლიდან თამაშობს. მის მომავალს ლონდონის “ჩელსისაც” უკავშირებდნენ, მაგრამ იტალიის ჩემპიონმა წამყვანი ფეხბურთელი არ დათმო.