სამხრეთ კორეაში მიმდინარე მსოფლიოს 20-წლამდე ჩემპიონატზე კიდევ სამი ნახევარფინალისტის ვინაობა გახდა ცნობილი - პორტუგალიისა და ვენესუელის ნაკრებებს, ზამბია, ურუგვაი და ინგლისიც შეუერთდნენ.

განსაკუთრებით საინტერესო, დაძაბული, თვალსასეირო და დრამატული გამოდგა ზამბიისა და გერმანიის ნაკრებთა შეხვედრა. ერთი შეხედვით, თითქოს ალემანები ფავორიტად უნდა მიგვეჩნია, მაგრამ გერმანია ჯგუფიდან რის ვაი ვაგლახით გავიდა, მაშინ, როდესაც, ზამბიის ნაკრებმა საწყის სტადიაზე ბრწყინვალედ ითამაშა. ამიტომაც იყო, რომ სპეციალისტები უფრო მეტ შანსს აფრიკელებს აძლევდნენ. თუმცა, პირველი ტაიმის მერე, გერმანია იგებდა ოხსის გოლით. და მაინც, გამოჩნდა მეორე ნახევარში, რომ ზამბია ამ ტურნირზე უკეთესი გუნდია და ევროპელებს სამი გოლი გაუტანა. შესაბამისად, თითქოს მათი გამარჯვება ეჭვქვეშ არ უნდა დამდგარიყო, მაგრამ გერმანიამ თითქმის შეუძლებელი შეძლო და შეხვედრის ბოლო 4 წუთში ორი ბურთი გაიტანა. თამაში დამატებით დროში გადავიდა, სადაც ისევ ზამბიამ იძალა და მაიემბეს გოლით მეოთხედფინალის საგზური მოიპოვა.

ზამბიის ნაკრები მეოთხედფინალურ სტადიაზე 5 ივნისს, იტალიას ანაც საფრანგეთს გაეჯიბრება.

შემდეგ ეტაპზე გასვლა არ გასჭირვებიათ ურუგვაისა და ინგლისის ნაკრებებს. ორივეს წარმატება ლოგიკური იყო, რადგან ჯგუფში თავიანთ მეტოქეებზე წარმატებით გამოვიდნენ - ურუგვაიმ კაპიტან დე ლა კრუსის პენალტით აჯობა საუდის არაბეთს, ხოლო ინგლისის ნაკრებს კოსტა რიკის დამასამარცხებლად ლუკმანის დუბლი ეყო. მართალია, კოსტა რიკელებმა მატჩის მიწურულს ერთი გოლი გაქვითეს, მაგრამ ეს თამაშის გადასარჩენად საკმარისი არ გამოდგა.

ურუგვაი მეოთხედფინალში 4 ივნისს, პორტუგალიელ თანატოლებს დაუპირისპირდება, ხოლო ინგლისის ნაკრები 5 ივნისს, ითამაშებს და მისი მეტოქე მექსიკა ან სენეგალი იქნება.

ურუგვაი - საუდის არაბეთი 1:0 (0:0)

გოლი: დე ლა კრუსი (50, პენ)

ზამბია - გერმანია 4:3 დ.დ (0:1)

გოლები: 0:1 ოხსი (37), 1:1 ბანდა (50), 2:1 საკალა (68), 3:1 მვეპუ (86), 3:2 სერდარი (89), 3:3 არვეილერი (90), 4:3 მაიემბე (107)

ინგლისი - კოსტა რიკა 2:1 (1:0)

გოლები: 1:0 ლუკმანი (35), 2:0 ლუკმანი (63), 2:1 ლეალი (89)

დღეს, ბოლო მერვედფინალური მატჩები გაიმართება და შესაბამისად, მეოთხედფინალისტების ვინაობაც სრულად გვეცოდინება. ცენტრალურია საფრანგეთისა და იტალიის ნაკრებთა მატჩი. მათ გარდა, შემდეგი ეტაპის საგზურისთვის მექსიკა - სენეგალი და აშშ - ახალი ზელანდია შეერკინებიან.