მიმდინარე სეზონში “მონაკოს” შესანიშნავმა ასპარეზობამ, როგორც საფრანგეთის ჩემპიონატში, ასევე ჩემპიონთა ლიგაზე, ამ გუნდის ფეხბურთელთა მიმართ დიდი ინტერესი გააჩინა და უკვე ცხადია, რომ მონაკოელებს ზაფხულში ცხელი სატრანსფერო ბატალიები ელით.

განსაკუთრებულ დაინტერესებას ინგლისის პერმიერლიგის კლუბები იჩენენ, რომელთა წარმომადგენლები უკვე ჩაერთნენ საქმეში. ჩემპიონთა ლიგის მეოთხედფინალურ დაპირისპირებას “მონაკოსა” და “დორტმუნდს” შორის ლონდონის “ჩელსის” სკაუტები დაესწრნენ და ერთაბაშად ოთხ ფეხბურთელზე აგროვებდნენ ინფორმაციას. საუბარია, მონაკოელთა მცველ ბენჟამენ მენდიზე, ნახევარმცველებზე ტომა ლემარსა და ტიემუ ბაკაიოკოზე, ასევე ფორვარდ კილიან მბაპეზე. მათგან ანტონიო კონტეს მთავარ სამიზნედ ბაკაიოკო და მბაპე სახელდებიან. თუმცა, ამ უკანასკნელის წარმომადგენლებს “არისტოკრატების” გარდა მანჩესტერული კლუბებიც დაუკავშირდნენ - “იუნაიტედი” და “სიტი”. “ქალაქელთა” ინტერესის სფეროშია მენდიც, რომლის თამაშით პეპ გვარდიოლაა მოხიბლული. ამასთან, 22 წლის ფრანგის გადაბირება “ლივერპულსაც” სურს.

“მონაკო” მიმდინარე სეზონში საფრანგეთის ჩემპიონატში 77 ქულით პსჟ-სთან ერთად ლიდერობს და პარიზელებზე ერთი თამაშით ნაკლები (32) აქვს ჩატარებული. ჩემპიონთა ლიგაში კი ლეიონარდო ჟადიმის გუნდი ნახევარფინალშია.