როგორც იქნა, ყველაფერს წერტილი დაესვა – “მილანი” ოფიციალურად გაიყიდა. აღნიშნულ ინფორმაციას “როსონერის” ვებგვერდიც ადასტურებს. როგორც განცხადებაშია ნათქვამი, “მილანი” ჩინელმა ინვესტორმა დავიდ ჰან ლიმ შეიძინა 740 მილიონი ევროს სანაცვლოდ. აზიელი ამიერიდან ევროპის ერთ-ერთი გამორჩეული კლუბის აქციათა პაკეტის 99.93% მფლობელია.

ამრიგად, სილვიო ბერლუსკონის ერა ლომბარდიულ გრანდში დასრულებულია. იტალიელმა “როსონერი” 1986 წლის 20 თებერვალს შეიძინა და გუნდს 31 წლის განმავლობაში ედგა სათავეში.

ამ დროის განმავლობაში კი, “მილანმა” ნამდვილი ეპოქა შექმნა, მოიგო რა 29 ტიტული: 8 სკუდეტო, 5 ჩემპიონთა ლიგა, 3 საკონტინენტთაშორისო თასი, 7 იტალიის სუპერთასი, 5 ევროპის სუპერთასი და 1 იტალიის თასი.

იტალიური მედიის ინფორმაციით, სილვიო ბერლუსკონის “მილანის” საპატიო პრეზიდენტის სტატუსს სთავაზობენ, თუმცა იქვე გავრცელებული ცნობის თანახმად, ბერლუსკონი აღნიშნული შეთავაზების უარით გასტუმრებას გეგმავს.