ესპანეთის საკალათბურთო ჩემპიონატის, ლიგა ენდესას XXVI ტურში გამანადგურებელი მარცხი იწვნია გიორგი შერმადინისა და ბექა ბურჯანაძის „მორაბანკ ანდორამ“, რომელიც „ბარსელონასთან“ სტუმრად უშანსოდ დამარცხდა 65-102.

„ანდორას“ სასტარტო ხუთეულში დაიწყეს თამაში ქართველმა ლეგიონერებმა - ტრადიციულად თანაგუნდელთა შორის საუკეთესო იყო შერმადინი. ჩვენებურმა პარკეტზე გატარებულ 22:20 წუთში საკუთარ გუნდს 18 ქულა და 5 მოხსნა შესძინა. გიორგიმ რვიდან ხუთი ორქულიანი ჩააგდო, ხოლო 11-დან რვა საჯარიმო გამოიყენა. შერმადინის მარგი ქმედების კოეფიციენტმა 21-ს უწია და ამ მაჩვენებლით იგი მხოლოდ ბარსელონელ ალექსანდ ვეზენკოვსა და თანაგუნდელ ბურჯანაძეს ჩამორჩა. ისიც აღსანიშნავია, რომ შედეგიანობით ვეზენკოვი და შერმადინი გამოირჩნენ - 18-18 ქულით. ოღონდ, ქართველს თანაგუნდელებმა ვერ აუბეს მხარი.

მხარი ვერ აუბესო, ყველა ანდორელზე შეიძლება ითქვას, გარდა ბექა ბურჯანაძისა - ქართველმა მოედანზე 25 წუთი გაატარა და ასეთი შედეგით დაასრულა თამაში: 13 ქულა, 4 მოხსნა, 2 პასი. ბექამ ორქულიანი ერთხელ ისროლა და ისიც გამოიყენა, ასპროცენტიანი სიზუსტით სტყორცნა საჯარიმოებიც: ორიდან ორი, ხოლო 5-დან სამი სამქულიანი ჩააგდო. მარგი ქმედების კოეფიციენტი მას 22 ჰქონდა და ამ მხრივ საუკეთესო იყო ალექსანდრ ვეზენკოვთან ერთად.

„მორაბანკ ანდორას“ 24 თამაშში 12 მოგება-წაგება აქვს და სატურნირო ცხრილში მერვე ადგილზე იმყოფება. ქართველების გუნდის მომდევნო მეტოქე „ესტუდიანტესი“ იქნება 2 აპრილს.