ბოლო წლებში ტრადიციად იქცა თბილისში, საერთაშორისო სტუდენტური საკალათბურთო ლიგის ერთ- ერთი ტურის ჩატარება, სადაც საქართველოს ტექნიკური უნივერსიტეტის გუნდი სტუ სისტემატურად მონაწილეობს.

თბილისმა ამჯერად ამ ტურს ნოემბრის დასაწყისში უმასპინძლა, რომელშიც მასპინძლებთან ერთად აზერბაიჯანის 18-წლამდელთა ნაკრები და რუსეთის ორი გუნდი ეკატერინბურგის ურფუ და მალახოვკის მგაფკ მონაწილეობდნენ. მომდევნო ეტაპზე თამაშის უფლება მალახოვკის გუნდმა და სტუ-მ მოიპოვეს, რომლებმაც I-II ადგილები დაიკავეს. თბილისის ტურამდე მომდევნო ეტაპზე რუსეთის მგუ (მოსკოვი) და უგტუ (უხტა) გავიდნენ.

აღნიშნული ტურნირის შესახებ worldsport.ge სტუ-ს მთავარ მწვრთნელ ლევან ტყეშელაშვილს ესაუბრა.

-კმაყოფილი ხართ თბილისის ტურში სტუ-ს გამოსვლით?

- მიუხედავად იმისა, რომ ბოლო შეხვედრაში მალახოვკის გუნდთან დავმარცხდით, მთლიანობაში შედეგით მაინც კმაყოფილი ვარ, რადგან მომდევნო ეტაპზე თამაშის უფლება მოვიპოვეთ.

- მალახოვკის მგაფკ-თან თამაშის შესახებ რას გვეტყვით?

- ამ თამაშის შედეგს აღარ შეეძლო გავლენა მოეხდინა სატურნირო მდგომარეობაზე, რადგან მანამდე გაირკვა მომდევნო ეტაპზე გამსვლელი გუნდების ვინაობა. სტუმართა მოგებას იმ ფაქტმაც შეუწყო ხელი, რომ მათ გუნდში ბევრად უფრო გამოცდილი კალათბურთელები თამაშობენ, ვიდრე სტუ-ში.

- სტუ მარტო მისი კალათბურთელებით იყო დაკომპლექტებული?

- ჩვენი გუნდი ძირითადად საქართველოს ოცწლამდელთა ჩემპიონატის მონაწილე ,,ჰიუნდაის’’ კალათბურთელებით არის დაკომპლექტებული, სადაც სტუ-ს რამდენიმე სტუდენტი თამაშობს. ლიგის დებულებიდან გამომდინარე, რისი უფლებაც გვქონდა, მოწვეული გვყავდა სუპერლიგის მონაწილე ორი კალათბურთელი, რომელთა ასაკი 25-დან- 27 წლამდეა. ამჯერად არჩევანი ზურა მაჩალაძესა (,,დინამო’’) და გიორგი ჯგერენაიაზე (,,სოხუმი’’) შევაჩერეთ.

- თბილისის ტურის დასრულების შემდეგ, სტუ-დან რომელიმე კალათბურთელს თუ გამოარჩევდით?

- რომელიმე კალათბურთელის გამორჩევისაგან თავს შევიკავებ.

- მომდევნო ეტაპისათვის გუნდში ცვლილებებს ხომ არ გეგმავთ?

- ამ ბიჭებმა მოიპოვეს მომდევნო ეტაპზე თამაშის უფლება და რატომ უნდა შევცვალო. თუ ვინმემ ტრავმა არ მიიღო, ისე გუნდში ცვლილება არ მოხდება.

- სად და როდის ჩატარდება მომდევნო ეტაპი?

- თბილისის ტურამდე მომდევნო ეტაპზე თამაშის უფლება რუსეთის გუნდებმა მგუ-მ(რუსეთი) და უგტუ-მ(უხტა) მოიპოვეს. ჯერ კიდევ ჩასატარებელია ორი ტური და გასარკვევია იმ ოთხი გუნდის ვინაობა, რომლებიც ჩვენთან ერთად მომდევნო ეტაპზე იასპარეზებენ. მომდევნო ეტაპზე გასული რვა გუნდი ორ ჯგუფში გადანაწილდება და ამის შემდეგ გაირკვევა იმ გუნდების ვინაობა, რომლებიც ოთხთა ფინალში მიიღებენ მონაწილეობას. მათ შორის გამარჯვებული გუნდი ჩემპიონთა ლიგის ოთხთა ფინალის მატჩებზე დასასწრებ ბილეთებს მიიღებს.

- თქვენი აზრით, რას აძლევს ახალგაზრდა კალათბურთელებს ამ ტურნირში მონაწილეობა?

- ახალგაზრდა კალათბურთელებისათვის ამ ტურნირში მონაწილეობას დიდი მნიშვნელობა აქვს. იღებენ გამოცდილებას, ეცნობიან ერთმანეთს და იძენენ მეგობრებს.