საქართველოს ეროვნული ნაკრების ყოფილი თავკაცი თემურ ქეცბაია ათენის აეკის მთავარი მწვრთნელი გახდა. როგორც ბერძნული კლუბის ოფიციალური ვებგვერდი იტყობინება, ქართველ სპეციალისტთან ორწლიანი კონტრაქტი გაფორმდა.
ქეცბაია აეკის ღირსებას ფეხბურთელობისას 1994-1997 წლებში იცავდა და ათენელთა მაისურით ჩატარებულ 119 მატჩში 39 გოლი გაიტანა. სწორედ აეკში წარმატებული თამაშის შემდეგ განაგრძო კარიერა მან ინგლისურ "ნიუკასლში".
48 წლის ქართველი მწვრთნელი ბოლოს კვიპროსულ აპოელ-ს ედგა სათავეში და გუნდი, რომელმაც კვიპროსის ჩემპიონობა მოიპოვა, სეზონის მიწურულს დატოვა.
