უზბეკეთის ქალაქ კარშიში სტარტი აიღო 25-ათასიანმა საერთაშორისო ტურნირმა, რომელშიც ძალებს ქართველი ჩოგბურთელი ალექსანდრე მეტრეველიც სცდის.

მეტრეველი მე-2 ნომრად არის განთესილი და პირველ წრეში კვალიფიკაციის ერთ-ერთ გამარჯვებულ, უზბეკ შონიქმატჯონ შოფაიზიევს ეთამაშება.

წყვილთა ტურნირში მეტრეველი და ბელარუსი ილია ივაშკა რუს ფედორ ჩერვიაკოვს და დენის იევსეევს გაეჯიბრებიან.

შეგახსენებთ, რომ კარშში ქალთა 25-ათასიანი ტურნირიც იმართება, რომელშიც მე-3 ნომრად განთესილმა სოფო შაფათავამ უკრაინელ ვერონიკა კაპშაის 6:4, 5:7, 7:5 სძლია და მერვედფინალში გააღწია. მერვედფინალში სოფო სლოვაკ რებეკა სრამკოვას და უზბეკ არინა ფოლტსს შორის უმჯობესს დაუპირისპირდება.

წყვილთა ტურნირში შაფათავა რუს ოლგა დოროშინასთან გახლავთ შეამხანაგებული და მერვედფინალში ძალებს მე-3 რეიტინგის მქონე სერბულ-ბულგარულ დუეტთან (სტოიანოვიჩი-ტერზისკა) მოსინჯავს.

გაირკვა იმ მეტოქეთა ვინაობა, რომელთაც მარიამ ბოლქვაძე ეგვიპტის ქალაქ შარმ ელ შეიხში მიმდინარე 10-ათასიან ტურნირში ეთამაშება.

შეგახსენებთ, რომ მარიამმა გასულ კვირას ანალოგიურ შეჯიბრში უკვე იმარჯვა, ახლა კი, წარმატების განმეორებას ეცდება.

ერთეულთა ტურნირში მე-4 ნომრად განთესილი ბოლქვაძე “უაილდ ქარდის” მქონე იტალიელ კლაუდია ფრანცეს ეთამაშება, ხოლო წყვილებში მარიამი და ფრანგი ვიქტორია მუნტეანი რუსებს – ბოჟუკოვას და პოგრებნიაკს გაეჯიბრებიან.