ლიბანის საკალათბურთო ჩემპიონატში კვლავაც წარუმატებლად ირჯება ნიკოლოზ ცქიტიშვილის “ჩემპვილი”, არადა, თავად ქართველი ფორვარდი გასულ ტურშიც ჩინებულად გამოიყურებოდა.

“ჩემპვილი” ჩემპიონატის ლიდერ “ალ რიადის” ესტუმრა და 88:98 დამარცხდა, ცქიტიშვილმა კი 36 წუთში 26 ქულა, 8 მოხსნა, 2 პასი და 1 ჩაჭრა მიითვალა.

ნიკოლოზმა 6-დან 5 ორქულიანი, 5-დან 3 სამქულიანი და 7-ვე საჯარიმო ჩააგდო, ბურთი 2-ჯერ დაკარგა, ამდენივე პერსონალური ფოლი მიიღო, მის წინააღმდეგ კი 5-ჯერ დაჯარიმდნენ.

ცქიტიშვილის სარგებლიანობის კოეფიციენტმა 35-ს უწია, რაც ორივე გუნდის რიგებში საუკეთესო მაჩვენებელი იყო.

“ჩემპვილი” 3 მოგებით და 11 მარცხით 9-გუნდიან ლიგაში ბოლო ადგილზე იმყოფება, მომდევნო მატჩს კი 22 მარტს “ბიბლოსის” წინააღმდეგ ჩაატარებს.