ტურინის “იუვენტუსის” მეკარე ჯანლუიჯი ბუფონმა მორიგი რეკორდი დაამყარა. 38 წლის კიპერმა იტალიის სერია A-ში გოლი ზედიზედ 974 წუთის განმავლობაში არ გაუშვა, რაც აბსოლუტური რეკორდია. აღნიშნულ ციფრს ჯიჯიმ დღეს ტურინულ დერბიში, “ტორინოსთან” მატჩისას უწია.

წინა რეკორდი “მილანის” მეკარე სებასტიანო როსის ეკუთნოდა, რომელმაც საკუთარი კარი ხელუხლებლად 1993-1994 წლების სეზონში 929 წუთის განმავლობაში შეინახა. ბუფონმა კი მას დღევანდელი მატჩის მეოთხე წუთზე გადაასწრო და შემდეგ მისივე მიღწევა მცირედით გააუმჯობესა. ლეგენდარული იტალიელის კარის ბადის შერხევა 48-ე წუთზე ანდრეა ბელოტიმ შეძლო, რომელმაც გამოცდილ კიპერს პენალტი გაუტანა.

ბუფონმა იტალიის ჩემპიონატში მშრალად მიჯრით 10 მატჩი (“უდინეზე”, “რომა”, “კიევო”, “ჯენოა”, “ფროზინონე”, “ნაპოლი”, “ბოლონია”, “ინტერი”, “ატალანტა” და “სასუოლო”) ჩაატარა. რეკორდისკენ სვლა კი ჯერ კიდევ მე-19 ტურში გენუის “სამპდორიასთან” დაიწყო. ბელოტიმდე მის კარში ბოლოს გოლის გატანა ანტონიო კასანომ მოახერხა, ზემოხსენებული თამაშის 64-ე წუთზე.