ვასილ კაკოვინის „ტულუზი“ სუპერ რაგბის სამხრეთაფრიკულ ფრანშიზთან, „შარქსთან“ გამართულ ამხანაგურ მატჩში 17:31 დამარცხდა. მატჩმა დიდი ინტერესი გამოიწვია და მას 9 ათასი მაყურებელი დაესწრო. ქართველი ბურჯი განაცხადში იყო და შეცვლაზე 32 წუთი ითამაშა.

ანგარიში „ზვიგენებმა“ ლელოთი გახსნეს და უპირატესობა ჯარიმით გაზარდეს, რაზეც ფრანგებმა ლელო-გარდასახვით უპასუხეს და ჩამორჩენა მინიმუმამდე დაიყვანეს. შესვენებამდე მასპინძლებმა მეორე ლელოც გაიტანეს, ამჯერად გარდასახვაც გამოიყენეს, მერე გუნდებმა ჯარიმები გაცვალეს და ტაიმი 18:10 დასრულდა. მეორე ტაიმის დებიუტში „შარქსმა“ ფრანგთა ჩათვლის მოედანში ბურთი მესამედ დაამიწა, რის შემდეგაც ინიციატივას „ტულუზი“ დაეუფლა და ლელო-გარდასახვით მატჩის გადარჩენის იმედი დაიტოვა, მაგრამ აფრიკელებმა ეს იმედები ჯარიმებით ჩააქრეს, ორი ზუსტი დარტყმა შეასრულეს და 31:17 იმარჯვეს.

შეგახსენებთ, რომ სუპერ რაგბის ახალი სეზონისთვის მზადების პროცესში, „შარქსმა“ რამდენიმე დღის წინ კიდევ ერთი ფრანგული გრანდი, „ტულონი“ დაამარცხა - 29:21. იმ შეხვედრაში სრულად ითამაშა კოტე მიქაუტაძემ, ხოლო ახალგაზრდა ქართველ კვაჭ ბადრი ალხაზაშვილს პირველ გუნდში დებიუტი ჰქონდა.

წყარო - www.worldrugby.ge