საქართველოს ეტლით მოფარიკავე გოგონათა ეროვნული ნაკრები დღეს უნგრეთში მსოფლიო თასზე საასპარეზოდ გაემგზავრება. ჩვენმა გუნდმა ირმა ხეცურიანის და ნინო თიბილაშვილის შემადგენლობით, მნიშვნელოვანი შეჯიბრების წინ საწვრთნელი შეკრება პოლონეთში გაიარა.

ვარშავაში 10-დღიანმა ინტენსიურმა მზადებამ ნაყოფიერად ჩაიარა. ქართველ ეტლით მოფარიკავეებს სხვადასხვა ქვეყნის ძლიერ და გამოცდილ პარტნიორებთან სპარინგის შესაძლებლობა ჰქონდათ.

2015 წლის საუკეთესო ქალ პარასპორტსმენისა და BP-ის ელჩის ირმა ხეცურიანის მთავარი მიზანი B კატეგორიაში რაპირით მოფარიკავეთა შორის, მომავალი პარაოლიმპიადის სალიცენზიო მარათონში დაწინაურებაა, ხოლო ანალოგიურ კატეგორიაში ხმლით მონაწილეთა შორის, ირმა მხოლოდ უმაღლესი მიზნებისთვის იბრძოლებს.

რაც შეეხება ნინო თიბილაშვილს, ის ახალგაზრდებს შორის A კატეგორიაში ბრინჯაოს მედლის მფლობელია, ამჟამად კი მისი მიზანი დიდებში საუკეთესო 8 მონაწილეს შორის შესვლა იქნება.

მსოფლიო თასისთვის მოსამზადებელ ეტაპს, სპორტსმენები და ნაკრების ხელმძღვანელი მალხაზ მესხი წარმატებულად აფასებენ.