საქართველოს ახალგაზრდული ნაკრების ფორვარდი ნიკა კაჭარავა კარიერას რუსეთის პრემიერლიგის „როსტოვში“ გააგრძელებს. როგორც რუსული კლუბის ოფიციალური ვებგვერდი იტყობინება, 22 წლის ფეხბურთელთან კონტრაქტი უკვე გაფორმდა და გუნდის ახალწვეული როსტოველებთან ერთად ამჟამად აბუ დაბიში შეკრებაზე იმყოფება. ხელშეკრულების ვადა ჯერჯერობით არ დასახელებულა.

კაჭარავამ ბოლო სამი სეზონი „ცხინვალში“ გაატარა და ამ კლუბის მაისურით საქართველოს ეროვნულ ჩემპიონატში ჩატარებულ 41 მატჩში 25 გოლი მიითვალა, ხოლო დავით ყიფიანის სახელობის საქართველოს თასის 8 მატჩში თავი 6 გოლით გამოიჩინა. მიმდინარე სეზონში ნიკა 13 გოლით ეროვნული პირველობის ბომბარდირთა დავას ლიდერობს.

ქართული კლუბის პრესსამსახურის ცნობით, კაჭარავასა და „ცხინვალს“ შორის მოქმედი კონტრაქტი ურთიერთშეთანხმების საფუძველზე შეწყდა. „ცხინვალი“ მადლობას უხდის ფეხბურთელს გაწეული სამუშაოსთვის და წარმატებას უსურვებს საფეხბურთო კარიერაში.

რაც შეეხება ნიკას ახალ კლუბს, „როსტოვი“ მიმდინარე სეზონის 18 ტურში მოპოვებული 34 ქულით რუსეთის პრემიერლიგაში მეორე ადგილზე იმყოფება და ლიდერ მოსკოვის ცსკა-ს მხოლოდ 3 ქულით ჩამორჩება.