ესპანეთის ეროვნული ნაკრების და ტურინის “იუვენტუსის” თავდამსხმელი ალვარო მორატა გუნდში მინიმუმ 2017 წლის ივლისამდე დარჩება. ფიფას მიერ მადრიდის “რეალისთვის” სატრანსფერო აკრძალვის შემდეგ ცხადი გახდა, რომ “სამეფო კლუბი” ესპანელს 2017 წლის ზაფხულამდე ვერ გამოისყიდის.

“იუვენტუსმა” “რეალს” ალვაროს სანაცვლოდ 2014 წელს 20 მილიონი ევრო გადაუხადა, ხოლო “ბლანკოსმა” ფეხბურთელის გამოსყიდვის უფლება დაიტოვა. ესპანურ გრანდს ახლა უკვე მომდევნო წელს შეუძლია ფეხბურთელში 30 მილიონი გადაიხადოს და სამშობლოში დააბრუნოს.

მიმდინარე სეზონში ფეხბურთელმა “ბიანკონერთან” კონტრაქტი 2020 წლის ივლისამდე გაახანგრძლივა. მორატამ 2015/16 წლების სეზონში 24 მატჩი ჩაატარა, გაიტანა 3 გოლი და 5 საგოლე გადაცემა შეასრულა.