ესპანეთის რანგით მე-2 ლიგა ლებ-გოლდში ბექა ბურჯანაძის “ლეიმა ბასკეტ კორუნამ” ერთ-ერთ ლიდერ, მე-2 ადგილზე მყოფ “მელილას” უმასპინძლა და მნიშვნელოვანი გამარჯვება იზეიმა – 77:71.

ქართველმა კალათბურთელმა მოედანზე 30:15 წუთი დაჰყო და 12 ქულა, 7 მოხსნა, 2 პასი და 1 დაფარება მოაგროვა. ბექამ 7-დან 3 ორქულიანი, 4-დან 1 სამქულიანი და 4-დან 3 საჯარიმო ჩააგდო, ბურთი 2-ჯერ დაკარგა, 2 პერსონალური ფოლი მიიღო, მის წინააღმდეგ კი 3-ჯერ დაჯარიმდნენ.

ბურჯანაძის კლუბმა 8 მოგება და 9 მარცხი მოაგროვა და მე-8 ადგილზე გადაინაცვლა, რაც პლეი-ოფში თამაშის უფლებას იძლევა. “ლეიმა ბასკეტ კორუნას” მომდევნო მატჩი 15 იანვარს, შინ, “ოურენსესთან” ელის.