ალბანეთის ეროვნული ნაკრების მწვრთნელმა ჯანი დე ბიაზიმ დაასახელა ის 25 ფეხბურთელი, რომლებიც კოსოვოსთან და საქართველოსთან ამხანაგური მატჩებისთვის მოემზადებიან. შეგახსენებთ, ალბანეთი-საქართველო 16 ნოემბერს ტირანაში გაიმართება.

ალბანელთა სიაში ორი დებიუტანტია: 23 წლის მცველი ფრედერიკ ვესელი შვეიცარიის "ლუგანოდან" და 18 წლის რეი მანაი მილანის "ინტერიდან". საინტერესოა, რომ მანაის 2 მატჩი ჩაუტარებია "ინტერის" ძირითად გუნდში, თუმცა უმეტესად დუბლებში თამაშობს.

საწყენია, რომ ასეთ კლუბებში ქართველებს ფეხბურთელი არ გვყავს. არადა, ახლა გადახედავთ ალბანელთა სიას და დარწმუნდებით, რომ ჩვენებზე გაცილებით ძლიერ გუნდებში თამაშობენ. ეს დიდწილად ალბანეთის ნაკრების ყოფილი ფორვარდის, იგლი ტარეს დამსახურებაა. ის მენეჯერია, სერიოზული კავშირები აქვს იტალიაში, საკმაოდ გავლენიანი ფიგურაა და არაერთი თანამემამულე ფეხბურთელი მიავლინა სერია ა-ს კლუბებში. ასევე, ბოლო წლებში ბევრი ალბანელი მოხვდა შვეიცარიაში.

სხვათა შორის, ეს პროცესი ტარემ დაახლოებით 5 წლის წინ დაიწყო და პროგრესიც სახეზეა: ალბანეთი ევროპის ჩემპიონატზე გავიდა და ჯგუფში ისეთ ნაკრებებს გაუსწრო, როგორებიც დანია და სერბეთი არიან. 10-15 წლის წინ ეს რომ ვინმეს ეწინასწარმეტყველა, გიჟად ჩათვლიდნენ.

დე ბიაზის 25-კაციანი სია:

მეკარეები: ეტრიტ ბერიშა (ლაციო, იტალია), ალბან ჰოჯა (პარტიზანი, სერბეთი), ორგესტ შეჰი (შკენდერბეუ)

მცველები: ანსი აგოლი (ყარაბაღი, აზერბაიჯანი), ნასერ ალი, არლინდ აიეტი (ორივე - ბაზელი, შვეიცარია), ლორიკ ჩანა (ნანტი, საფრანგეთი), ბერატ ჯიმშიტი (ციურიხი, შვეიცარია), ფრედერიკ ვესელი (ლუგანო, შვეიცარია), ანდი ლილა (იანინა, საბერძნეთი), ამირ აბრაში (ფრაიბურგი)

ნახევარმცველები: მიგიენ ბაშა (ლუცერნი, შვეიცარია), საბიენ ლილაი(შკენდერბეუ), ლედიან მემუშაი (პესკარა, იტალია), ტალანტ ჯაკა (ბაზელი, შვეიცარია), ჰეროლინდ შალა (ლიბერეცი, ჩეხეთი), ბეკიმ ბალაი (რიეკა, ხორვატია), ელსაიდ ჰისაი (ნაპოლი, იტალია), სოკოლ სიკალეში (ბასაკშეჰირი, თურქეთი)

თავდამსხმელები: შელკენ გაში (ბაზელი, შვეიცარია), ოდისე როში (რიეკა, ხორვატია), არმანდო სადიკუ (ციურიხი, შვეიცარია),ერმირ ლენიანი (ნანტი, საფრანგეთი), რეი მანაი (ინტერი, იტალია)