ხორვატიის ნაკრებისა და უკრაინული “დნიპროს” თავდამსხმელი ნიკოლა კალინიჩი კარიერას ფლორენციის “ფიორენტინაში” გააგრძელებს. აღნიშნული ინფორმაცია უახლოეს დღეებში ოფიციალურ სახეს მიიღებს.
“კალინიჩი გუნდთან ერთად არ იქნება ოდესაში, სადაც ჩემპიონატის მე-5 ტურში “შახტარს” ვეთამაშებით. იგი იტალიაში გაფრინდა, “ფიორენტინასთან” კონტრაქტის გასაფორმებლად”, - წერს “დნიპროს” ვებგვერდი.
ნიკოლა კალინიჩის სატრანსფერო თანხად 5-6 მილიონი ევრო სახელდება.
27 წლის ხორვატმა გასულ სეზონში ევროპის ლიგაზე 5 გოლი გაიტანა, მათ შორის ფინალშიც. ხოლო მიმდინარე სეზონში უკრაინის ჩემპიონატში ჩატარებულ 4 შეხვედრაში თავი სამჯერ გამოიჩინა.
