იტალიური "მილანის" ვიცე-პრეზიდენტი ადრიანო გალიანი მადრიდში იმყოფება. "სქაი სპორტის" ინფორმაციით, იტალიელი მადრიდის "ატლეტიკოს" ნახევარმცველის, მარიო სუარესის აგენტს, მანუელ გარსია ქუილონს შეხვდა.
ქუილონი ამავდროულად "როსონერის" მეკარის, დიეგო ლოპესის აგენტიც გახლავთ და მან სწორედ ამ ორი ფეხბურთელის შესახებ ისაუბრა.
"სუარესი "მილანს" ძალიან მოსწონს, მაგრამ რა მოხდება არ ვიცი. დიეგო ლოპესი კი იქ დარჩება, სადაც არის", _ თქვა ქუილონმა.
იტალიელი ჟურნალისტები გალიანის მადრიდულ ვოიაჟს კარლო ანჩელოტისთან აკავშირებდნენ, თუმცა თავად "როსონერის" მაღალჩინოსანმა ბრძანა, რომ ესპანეთის დედაქალაქში მხოლოდ ანჩელოტის გამო არ იმყოფება.
