ჩრდილო ამერიკის საფეხბურთო ლიგა NASL – ის მეოთხე ტურში “მინესოტა იუნაიტედი” შინ “სან ანტონიო სკორპიონს” დაუპირისპირდა (2:2). ანგარიში მე-9 წუთზე “სან ანტონიო სკორპიონსის” ფეხბურთელმა ზურაბ ცისკარიძემ შორეული საჯარიმო დარტყმით გახსნა, მან 55 მეტრიდან გაიტანა გოლი. ცისკარიძემ მატჩი სრულად ჩაატარა, 31-ე წუთზე კი გააფრთხილეს. 11 გუნდიან ჩემპიონატში “სან ანტონიო სკორპიონსი” 1 ქულით ბოლო ადგილზეა.

https://www.youtube.com/watch?v=v31vslk0G5Q

კვიპროსის პირველი დივიზიონის მეორე ექვსეულში “ნეა სალამინამ” შინ 3:0 დაამარცხა “აია ნაპა.” გამარჯვებულთა შემადგენლობაში გიორგი პაპავამ სრულად ითამაშა, შოთა გრიგალაშვილი კი ტრავმის გამო კვლავ ვერ ეხმარება გუნდს. კვიპროსის პირველი დივიზიონის მეორე ექვსეულში “ნეა სალამინა” 30 ქულით მე-2 ადგილზეა.

კვიპროსის პირველი დივიზიონის მეორე ექვსეულში “ახნასმა” სტუმრად 2:1 დაამარცხა “ოთელოსი.” დამარცხებულთა შემადგენლობაში როინ კვასხვაძემ და ელგუჯა გრიგალაშვილმა სრულად ითამაშეს. 21-ე წუთზე კვასხვაძემ ყვითელი ბარათი მიიღო. “ოთელოსის” განაცხადში მოხვდა ლევან ხმალაძე, თუმცა არ უთამაშია. ქართველი ფეხბურთელების გუნდი 20 ქულით ბოლო ადგილს იკავებს.

უნგრეთის ჩემპიონატის 25-ე ტურში “გიორმა” შინ 1:0 დაამარცხა პუსკას “აკადემი.”გამარჯვებულთა განაცხადში ვერ ვიხილეთ გიორგი ქვილითაია. უნგრეთის 16 გუნდიან ჩემპიონატში “გიორი” 32 ქულით მე-9 ადგილზეა.

უკრაინის პრემიერლიგის 21-ე ტურში ლვოვის “კარპატმა” შინ 4:1 დაამარცხა დონეცკის “ოლიმპიკი.” მასპინძელთა შემადგენლობაში ამბროსი ჩაჩუამ სრულად ითამაშა, ბუბა დაუშვილი კი 64-ე წუთზე გამოჩნდა მინდორზე. ქართველი საყრდენი მე-80 წუთზე გააფრთხილეს. დონეცკელთა შემადგენლობაში სრულად ითამაშა მეკარე ზაურ მახარაძემ. უკრაინის პრემიერლიგის 14 გუნდიან ჩემპიონატში დონეცკის “ოლიმპიკი” 22 ქულით მე-9 ადგილზეა, “კარპატი” კი 10 ქულით მე-13 პოზიციას იკავებს.

უკრაინის პრემიერლიგაში ზაპოროჟიეს “მეტალურგისა” და ხარკოვის “მეტალისტის” მატჩი ფრედ 0:0 დასრულდა. შესვენების შემდეგ ზაპოროჟიელთა შემადგენლობაში ვალერიან გვილია გამოჩნდა. უკრაინის პრემიერლიგაში “მეტალურგი” 20 ქულით მე-10 ადგილზეა.

ჯაბა კანკავას “დნიპრომ” შინ 1:0 დაამარცხა “მარიუპოლი.” მარკევიჩის გუნდის განაცხადში ვერ ვიხილეთ ჯაბა კანკავა. “დნიპრო” 47 ქულით მე-3 ადგილზეა.

პოლონეთის ექსტრაკლასის 29-ე ტურში “ბელხატოვისა” და “იაგიელონიას” მატჩი ფრედ 0:0 დასრულდა. “ბელხატოვის” განაცხადში კვლავ ვერ ვიხილეთ გიორგი სარჯველაძე. “იაგიელონიას” განაცხადს მიღმა აღმოჩნდნენ გიორგი ფოფხაძე და ნიკა ძალამიძე. ფოფხაძის არ ყოფნის მიზეზი გასულ ტურებში მიღებული 4 ყვითელი ბარათია, ძალამიძეს კი მცირე ტრავმა აწუხებს. პოლონეთის “ექსტრაკლასში” 16 გუნდი მონაწილეობს. “იაგიელონია” 46 ქულით მე-3 ადგილზეა, “ბელხატოვი” კი 31 ქულით მე-15 პოზიციას იკავებს.