ბირმინგემის “ასტონ ვილას” ბელგიელი თავდამსხმელი კრისტიან ბენტეკე შესაძლოა ზაფხულში იტალიური “მილანის” ფეხბურთელი გახდეს. ამის შესახებ ინგლისური გამოცემა “დეილი მირორი” იუწყება. ინგლისელი ჟურნალისტების ვარაუდით, ბენტეკე “ვილა პარკზე” ბოლო სეზონს ატარებს და “როსონერი” მის მომავალ გუნდებს შორის ყველაზე რეალურად მოსჩანს. თანაც, იტალიური გრანდი ცენტრფორვარდს გამალებით ეძებს, რადგან ფერნანდო ტორესის შემდეგ, იმედი ვერც იანვარში იჯარით აყვანილმა მატია დესტრომ გაამართლა. იტალიელების გარდა, ბელგიელის სახელს გერმანულ “ვოლფსბურგსაც” უკავშირებენ.
მიმდინარე სეზონში 24 წლის ფორვარდმა ინგლისის პრემიერლიგაში 23 ჩატარებულ მატჩში 9 გოლის გატანა შეძლო.
