ბრაზილიაში მყოფმა რაფა ნადალმა ჯერ რიო დე ჟანეიროს კარნავალზე იხალისა, დღეს დილით კი ამ ქალაქის ტურნირში შარშან მოპოვებული ტიტულის დაცვას წარმატებით შეუდგა. რეიტინგსიის მესამე ნომერმა კორტის მასპინძელ ტომაზ ბელუჩის 2 სეტით, 6:4, 6:1 მოუგო.

ესპანურ-ბრაზილიური დაპირისპირება საათნახევარს გაგრძელდა. ამ სათამაშო დროის განმავლობაში რაფამ 6 ბრეიკი და 2 ეისი შეასრულა. ნადალისა და ბელუჩის დაპირისპირებათა ანგარიში 4:0 გახდა.

Rio Open-ზე პირველ ნომრად განთესილი ნადალი მერვედფინალში თანამემამულე პაბლო კარენო-ბუსტას შეხვდება.

წარმატებით აიღო სტარტი რეიტინგსიის მეცხრე ნომერმა დავიდ ფერერმაც. ნადალის მსგავსად მასაც საათნახევარი დასჭირდა მერვედფინალში გასასვლელად - 32 წლის ფერერმა კიდევ ერთ ესპანელ დანიელ ხიმენო-ტრავერს 6:4, 6:3 სძლია. მომდევნო ეტაპზე დავიდი ჰოლანდიელ ტიმო დე ბაკერს დაუპირისპირდება.