ხუთ დღეში სტარტს იღებს სახელცვლილი ევროპის ერთა თასი, აწ უკვე რაგბი ევროპის ჩემპიონატის 2015 წლის გათამაშება. 7 თებერვალს გათამაშების მოქმედი ჩემპიონები, “ბორჯღალოსნები” გასვლაზე “ბ” დივიზიონიდან ამოსულ გერმანიის ეროვნულ ნაკრებ გუნდს, ქალაქ ჰოიზენშტამის “სპორტცენტრუმ სტადიონზე” ერკინებიან.

გერმანია-საქართველოს მატჩიდან ერთი კვირის თავზე, 14 თებერვალს, ჩვენი გუნდი წლევანდელ სარაგბო სეზონს შინ პორტუგალიის ეროვნული ნაკრების წინააღმდეგ რკენით გახსნის. შეხვედრა მიხეილ მესხის სტადიონზე 17:00 საათზე დაიწყება.

საქართველო-პორტუგალიის მატჩის ბილეთების გაყიდვა 9 თებერვალს დაიწყება. ბილეთები მესხის სტადიონის სალაროებში, ყოველდღე 11:00-19:00 საათამდე გაიყიდება – ფასი 3 და 5 ლარი. ყველა ბილეთი დანომრილია.

“ბორჯღალოსნები” 2015 წლის პირველ ღია ვარჯიშს 10 თებრვალს (სამშაბათი) გამართავენ. ღია ვარჯიში ტრადიციულად შევარდენის სანაკრებო ბაზაზე, 16:00 საათზე დაიწყება. შეგახსენებთ, რომ ღია ვარჯიშზე ქომაგებისა და მედია საშუალებების წარმოადგენლებისთვის დასწრება თავისუფალია.

ქართული სარაგბო ოჯახის სახელით, ყველას მოგიწოდებთ დროულად ვიზრუნოთ მატჩის ბილეთების შეძენაზე, დაწყებამდე ერთი საათით ადრე მივიდეთ სტადიონზე, რათა ყველამ ერთად, სავსე ტრიბუნებიდან ტრადიციული ომახიანი ქომაგობით გავხსნათ წლევანდელი სანაკრებო სეზონი!

რაგბი ჩვენი თამაშია!

www.rugby.ge